La liturgia usitada, beinpreparada tut a scret en plirs lungatgs, ei sesplegada el rom d'in survetsch divin pontifical cul celebrant principal, sia eminenza cardinal Edwin Frederick O'Brien (in American ella Curia a Roma) e dapi 2011 grondmeister digl Uorden dils cavaliers dalla s. Fossa da Jerusalem. El ei vegnius assistius da msgr. Giacomo Grampa, uestg emeritau da Ligiaun, msgr. uestg Vitus Huonder, da Cuera, sco era da msgr. Martin Gächter, uestg auxiliar emeritau da Basilea. Els ein tuts commembers digl Uorden cun incaricas specialas. Era avat Vigeli Monn ha concelebrau.

 

Beinvegni era per romontsch

Il beinvegni ha igl uestg diocesan, msgr. Vitus Huonder, fatg simpaticamein en tschun lungatgs (tudestg, franzos, talian, romontsch ed engles), rendend attents all'incarica digl Uorden equester dalla s. Fossa: Survir a Diu cun fervur e legria e segidar culs cristians en Tiarasontga. Salids ha era il statalter (suprem) digl Uorden dils cavaliers en Svizra, Jean-Pierre de Glutz-Ruchti, purschiu per l'investitura ch'ei mintgamai la culminaziun dallas festivitads digl Uorden equester.

 

L'investitura sco culminaziun

Quella entscheiva cun la proclamaziun dalla nominaziun, suttascretta da cardinal O'Brien, che dat als novs commembers il dretg da purtar las insignias digl uorden. Ils candidats supplicheschan per l'investitura e fan las empermischuns. Lu vegn il candidat clamaus – in suenter l'auter per num – agl altar per rescheiver ord ils mauns da cardinal O'Brien il segn dad esser cavalier (Ritterschlag). Quei mument astga il niev commember era purtar la rosetta vid il tschiep, il manti alv, il beret, vons alvs, crusch entuorn culiez e retscheiva il document da recepziun.

En tut ein 19 novs cavaliers vegni recepi uonn egl Uorden. Denter quels secattan era dus Romontschs: Baltermia Peterelli, a. president dil Cussegl grond, Savognin, e Willi Lozza, staus emploiau da banca, Mustér. Recepi vegnan era ina dama (cavaliera) e dus spirituals. Suenter ha ei aunc dau diversas promoziuns. Denter ils promovi a comtur fuva era Filip Dosch, deputau, Cunter. Divers ein vegni distingui per merets specials cun la Palma d'aur da Jerusalem. Denter quels era cardinal Henri Schwery, Sion. Cun il cant Lauda Jerusalem ei igl act d'investitura terminaus.

Sin quei ei divin festiv culs celebrants numnai sura, il priedi dil cardinal en engles e supplicas en tuts quater lungatgs svizzers. L'unfrenda mondi en favur dils cristifideivels en Tiarasontga che vegnan tradiziunalmein susteni generusamein digl Uorden equester en Svizra. Alla fin dil survetsch divin suonda l'oraziun digl Uorden, vegn cantau il „Tutpussent altissim Diu" en tuts quater lungatgs naziunals e dau la benedicziun pontificala.

 

Reh e variau program accumpignont

L'investitura, la sonda vargada, ei stada el center dil grond inscunter annual digl Uorden dils cavaliers svizzers dalla s. Fossa (cun en tut biebein 300 comemmbers). Entschiet ha ei gia il venderdis cun la messa per la vigelgia. Celebrant principal, assistius da divers uestgs ed avat Vigeli, ei uestg Pier Giacomo Grampa, il grondpriur digl Uorden, en baselgia claustrala. Embelliu musicalmein han il organist claustral frater Stefan e la violinista Oana Camartin. Lu ein ins separticipaus al cumplet cul convent e suenter tschenau en claustra.

Sonda avonmiezdi ha igl Uorden equester salvau siu capetel (radunonza generala) en la sala dalla Claustra. La sera ha ei dau in grond banchet cun datier da 200 persunas ella Sala Fontauna el Center sportiv cun plirs plaids, stupentas producziuns dalla renomada Compignia Rossini, che ha survegniu applaus tut a stend. In grond ed era meritau engraziament ha ei dau alla fin pils organisaturs dalla investitura cun mistral Martin Quinter alla testa, sco president dalla comtura Currrezia (Grischun e Principadi da Liechtenstein), per l'organisaziun perfetga.

La dumengia han cavaliers, damas tut en ner e spirituals ed in grond pievel da Mustér assistiu en baselgia parochiala a s. Gions al survetsch divin pontifical, celebraus digl uestg auxiliar Martin Gächter, priur dalla secziun dalla Svizra tudestga. Beinvegni ha sur plevon Georg Changeth fatg. Il Chor-baselgia s. Gions ha embelliu il survetsch divin cun la „Missa festiva en F", d'Alvin Muoth, sut direcziun d'Aluis Hosang e Claudio Simonet all'orgla.

Il priedi da msgr. uestg Gächter ei sebasaus sil bellezia evangeli dalla carezia divina. En connex cun quella, ch'ei infinita, ha el fatg in link viers la Sinoda episcopala da quest atun a Roma davart famiglia, lètg, divorzi, sexualitad e homosexualitad, constatond che biars hagien dau a scret dad entellir ch'els spetgien che Roma vegni fetg encunter. Il predicatur ei staus plein capientscha pils postulats dils criticasters dalla morala existenta. Persuenter ha el retschiert applaus alla fin dil priedi en baselgia. Denton buca da tuts. Entgins, oravontut cavaliers, ein stai schoccai ed han criticau fetg il priur dalla secziun svizra digl Uorden equester dalla s. Fossa.

Il concert dalla Societad da musica e dils tamburs da Mustér avon casa da scola – pil Di dallas mummas – ed igl apero suandont han lu tuttina procurau per ina buna e surtut calmonta fin d'in grond eveniment.

 

Dr. Giusep Capaul